.jpg)
IL-FESTA TAL-EPIFANIJA TPOGGI QUDDIEMNA KUNTRASTI MA KULLIMKIEN :
KUNTRAST BEJN TAL-QRIB U TAL-BOGĦOD
Erodi u n-nies tal-palazz kienu jgħixu fil-qrib
(ta’ Betlem). Bieb u għatba. Safrattant huma rrifjutawh. Erodi “bir-reqqa”
kollha beda jitkixxef biex ikun jaf fejn hu ħa jeqirdu.
Għall-kuntrarju, il-Maġi kienu jgħixu fil-bogħod.
Ħallew kollox, imxew fuq li mxew, vjaġġ twil u ġew “ifittxuh”: “Fejn hu
s-sultan tal-Lhud li twieled?”
KUNTRAST BEJN ID-DLAM U D-DAWL
Erodi qed jgħix fid-dlam tal-vizzji, tal-ħażen,
tal-pjaċiri, tad-dnub. Xħin feġġ id-dawl, id-Dawl ma laqgħux. Ipprefera d-dlam
mid-dawl. Anzi, ried jitfi dak li kien id-Dawl għax ried joqtol lix-Xemx
tal-Ġustizzja, li hu Kristu.
Għall-kuntrarju l-Maġi jgħodd għalihom dak li
tgħid il-Liturġija: “Poplu li kien miexi fid-dlam ra dawl kbir. Dawl kbir idda
fuqhom.” Il-Maġi laqgħu d-dawl li hu Kristu.
Lezzjoni
għalina.
Nisimgħu mill-kliem ta’ San Pawl lill-Efesin:
“Intom darba kontu dlam, imma issa intom dawl fil-Mulej. Għixu ta’ wlied
id-dawl li intom... Frott id-dawl jinsab f’kull ma hu tjieba, f’kull ma hu
ġustizzja, f’kull ma hu verità.” (Ef 5,8)
Erodi kien iben id-dlam u baqa’ fid-dlam. Il-Maġi
u aħna l-Insara bħalhom nissejħu “ulied id-dawl”, “ulied il-kewkba”.
