.jpg)
L-Ewwel Ħadd tar-Randan (Sena A)
MA’ KRISTU NISSIELTU U NIRBĦU T-TENTAZZJONIJIET
Ix-Xitan jeżisti. Kristu stess jitlob lill-Missier biex lill-Appostli “iħarishom
mill-Ħażin” (Ġw 17,15). San Pawl jitkellem ċar fl-ittra lill-Efesin u
jagħmlulhom kuraġġ “biex ifittxu jieqfu għat-tnassis tax-Xitan” (Ef 6,11).
L-istess San Pawl, fl-ittra lil Timotju, iwissi: “Dawk li jridu jistagħnu,
jaqgħu fit-tiġrib u fix-xibka... u jitfgħu lill-bniedem għall-qerda u
t-telfien.” (1 Tim 6,9)
Ġesù fil-Vanġelu tal-lum ippermetta li jiġi mġarrab mix-Xitan biex ikun
mudell għalina kif nissieltu u nirbħulu fit-taqbida li kull wieħed u waħda
minna għandna mat-tentatur.
Għalhekk naraw żewġ punti:
1. it-tattika tax-Xitan u
t-tweġiba ta’ Ġesù
2. l-armi tan-Nisrani
fit-taqbida mal-Ħażin.
L-EWWEL
PUNT: IT-TATTIKA TAX-XITAN U T-TWEĠIBA TA’ KRISTU
Ix-Xitan huwa espert fis-sengħa tiegħu. Jattakka fejn isibek dgħajjef.
Jagħmel ta’ birruħu joffrilek xi ħaġa biex imbagħad jaqbdek. Jitfagħlek
il-lixka biex, kif ngħidu, jaqbdek fis-sunnara.
Kristu, quddiem in-nasbiet tax-Xitan, dejjem jirrikorri għall-Kelma ta’
Alla. Nagħtu daqqa t’għajn ħafifa lejn it-tliet tentazzjonijet.
1.
L-ewwel tentazjoni:
it-tentazzjoni tal-ġid materjali
Ix-Xitan, billi kien jaf li Ġesù kien mifni bi-ġuħ, ġarrbu hekk: “Jekk inti Bin Alla, ordna li dan il-ġebel
isir ħobż.”
Imma Ġesù jwieġeb billi jikkwota l-Kelma ta’ Alla: “Mhux bil-ħobż biss
jgħix il-bniedem, iżda b’kull kelma li toħroġ minn fomm Alla.”
Jiġifieri l-ħobż mhux kollox. Hemm xi ħaġa aqwa mill-ħobż u mill-ġid
materjali.
2.
It-tieni tentazzjoni:
it-tentazzjoni tal-popolarità
Ix-Xitan jgħid: “Jekk inti
Bin Alla, inxteħet għal isfel...” (u uri kemm inti kbir, għax s’intendi mhu ser
jiġrilek xejn!)
Imma Kristu reġa’ tennielu l-Kelma ta’ Alla miktuba: “Hemm miktub: ‘La
ġġarrabx lill-Mulej Alla tiegħek’.”
Għal Ġesù, is-Saltna ta’ Alla ma tiġix bil-popolarità, iżda bl-għotja
tiegħu fuq is-salib.
3.
It-tielet tentazzjojni:
it-tentazzjoni tal-poter
Ix-Xitan “urieh
is-saltniet kollha tad-dinja u l-glorja tagħhom, u qallu: ‘Dawn kollha nagħtihom lilek jekk tinxteħet tadurani’.”
Imma Kristu kien pront wieġbu: “Itlaq, Xitan! Għax hemm miktub, ‘Lill-Mulej Alla tiegħek għandek tadura. Lilu
biss taqdi’.”
Kristu rebaħlu lix-Xitan. U minn dakinhar ’l hawn xejn ma jista’ jagħmlilna
x-Xitan, jekk nibqgħu magħqudin ma’ Kristu.
IT-TIENI
PUNT: L-ARMI TAN-NISRANI FIT-TAQBIDA MAL-ĦAŻIN
X’nitgħallmu mill-Vanġelu tal-lum? Ix-Xitan jeżisti. Imma Kristu aqwa
minnu. Għalxejn jonsbilna n-nasbiet tiegħu x-Xitan. Jekk inkunu magħqudin ma’
Kristu u nużaw l-armi li jagħtina f’dan ir-Randan imqaddes, ix-Xitan ma jistax
għalina.
Quddiem it-tliet tentazzjoni li jġarrbu lilna:
-
it-tentazzjoni tal-ġid materjali
-
it-tentazzjoni tal-popolarità
-
it-tentazzjoni tal-poter,
Ġesù, f’dan ir-Randan, jagħtina tliet armi biex nitħarrġu fihom.
1.
L-ewwel arma: it-talb
Ġesù talab u jridna nitolbu: “Itolbu biex ma tidħlux fit-tiġrib.”
2.
It-tieni arma: is-sawm
Jiġifieri ċ-ċaħda tagħna nfusna. Kontra l-ġibdiet diżordinati tagħna, f’dan
ir-Randan irridu nitħarrġu billi niċċaħħdu mill-ikel u x-xorb żejjed,
mill-egoiżmi tagħna, mis-suppervja tagħna, mill-kapriċċi tagħna, mill-frugħat
tagħna, mill-użu diżordinat tal-mass media.
3.
It-tielet arma: is-smigħ
tal-Kelma ta’ Alla
Fil-Pastorali tant sabiħa u meħtieġa li ħarġulna l-Isqfijiet tagħna għal
dan ir-Randan, huma ħeġġewna biex niltaqgħu ma’ Alla u nisimgħu l-leħen tiegħu
fil-qari tal-Bibbja u fil-predikazzjoni, fosthom fl-Eżerċizzi mqaddsa.
L-Isqfijiet qalulna: “Bħal Ġesù, neħtieġu lkoll l-esperjenza tad-deżert
fejn niltaqgħu ma’ Alla u niltaqgħu magħna nfusna. U nidħlu fil-verità (biex
nirriflettu) dwar min aħna, fejn qegħdin, x’irridu mill-ħajja, x’irid Alla
minna u fejn sejrin.”
Konklużjoni
Nirrepetu t-talba li għidna nhar l-Erbgħa tar-Rmied: “Agħtina, Mulej, li
bis-sawn imqaddes nibdew it-taħriġ għat-taqbida tagħna bħala dixxipli ta’
Kristu, ħalli nitwettqu bil-qawwa tar-rażan u nissieltu tajjeb kontra l-ispirtu
tal-ħażen.
Għalhekk,
1.
Nagħtu widen għall-predikazzjoni tal-Kelma ta’ Alla, “li f’dan
iż-żmien – tgħidilna l-Pastorali tal-Isqfijiet – għandna ċċaqlaqna biex
ninqalgħu minn fejn inkunu weħilna.”
2. Nersqu lejn is-Sagramenti
mqaddsa – kif tħeġġiġna l-Pastorali tal-Isqfijiet – ħalli nsibu l-forza biex
niċċaqilqu u ninbidlu, u hekk ma nikkuntentawx ruħna kif aħna.
(Din l-omelija hija nota bbażata
fuq l-omelija tal-Kardinal Christoph Schonborn, mill-ktieb tiegħu “Il mio Gesù”.)
